محببتله آچیلان. سحرین شامی یوخدور 

ائله چیچکلی باغدیر. تله سی. دامی یوخدور 

چاغیران جان چاغیریر . چاغریلان جان جان دئیر 

آدلار ائله ایتیرلر. هرکس وار، نامی یوخدور 

سالاملار اورگدندی . اورگلره ایله شیر 

مئی ایچن خم دان ایچیر . باده سی ،جامی یوخدور 

آغیزدان چیخان سوزلر . بیر بیریندن تاملی دیر 

سانکی عشقین اودوندا . بیشیب دیر خامی یوخدور 

الی چاتان هر یئرده . بیر بیریله یاردیمدا 

هامی آرزی سیلادیر . هئچ بیر ناکامی یوخدور 

بازار وار تره زی یوخ . گوزل گوزل ایشلری 

الیندن گلن گورور . بیلیر انعامی یوخدور

بیردیر

سجده قیلما بوتلارا . جان بیردی جاناندا بیر 

هر اورگده بیر یئر وار. هر جیسمیده جاندا بیر 

بو دوزدورکی قوناقلار. بزگ دیلر هر ائوه 

اورگ ائوینده یئر بیر. گرگدی مهماندا بیر 

دونیا مولکونون شاهی. دفتری، کتابی بیر 

باغ بیردیر باغبان بیردیر. گزمه گه بوستاندا بیر 

ایکیلیگ بو دونیادا. یعقوبودا کور ائیلر 

یوسف بیردیر دونیادا. زیلیخا، کنعاندا بیر 

عشق عالمینده گویدن. هر جور غم یاغا بیلر 

آنجاق بوتوو باخاندا. درد بیردی، درماندا بیر 

گورورسن هربیرقوشون. آغزیندا مین آوازوار 

غزللره باخاندا. سوز بیردیر، دیواندا بیر 

هر نه وار یئر اوزونده. صمد بیر نشانه دیر 

یوللاری چوخ اولسادا. مقصد بیر نشاندا بیر