دوواردان باجا دلمه لیگ 

یوللاردان بیری گلمه لیگ 

کاغاذلاردا بیر کلمه لیگ 

سوزومه یئر وار گوره سن؟ 

اوزوگلردن بیر تاخیملیق 

بیلاغلاردان بیر آخیملیق 

آیدینلیقا بیر باخیملیق 

گوزومه یئر وار گوره سن؟ 

سئویجیمده . آغلاریمدا 

اوز قویماغا داغلاریمدا 

بیر ایاقلیق باغلاریمدا 

اوزومه یئر وار گوره سن؟ 

دوورم دولو موعممادی 

اگردی .آنجاق . آممادی 

باشلار باشلاری قانمادی 

چوزومه یئر وار گوره سن؟ 

نملی قارانلیق بیجاغدا 

غملی. حسرتلی قوجاغدا 

کولگلی سویوق اوجاغدا 

کوزومه  یئر وار گوره سن؟

اوجاقلارین بوش ساجیلا 

باشلاردا آغری تاجیلا 

بو قدر دردله آجیلا 

دوزومه یئر وار گوره سن؟ 

آشیب  هوندورلوگ .اوجالیق 

حاخلایب داها قوجالیق 

مندن سونرا بیر هئجالیق 

ایزیمه یئر وار گوره سن؟ 

ص.پ