عشق دردی

عشق دردی ائله درتدیر . شاه دورور فرمانیندا

مسیحین اللریده . عاجیزدیر درمانیندا 

فرهادلار چکیب داغا . سالیب مجنونلار چوله 

وارلیق بویو ذررجه . خلل یوخ ایمانیندا 

اولومسیز بیر وارلیقدیر . خزانی یوخ. قیشی یوخ 

اوزو ساری دیر آنجاق . یاشیللیقدیر جانیندا

نئجه غمدیر گولوش وار ؟ اوزونده گوزلرینده 

نئجه داردیر جان تاپیر . اولنلر دامنینده  

چول اولسون باییر اولسون . داغ اولسون دره اولسون 

مینلر جوجه نی آلیر . گزدیریر دندانیندا 

بیر دنیزدیر نه اوجو . نه ده بیجاقی واردیر 

هرکس دوشرسه آنجاق . یاشادیر طوفانیندا

گئجه یارینین گونو

باهاردیر ،هریان عطیردیر ؟ یا سن چیخیبسان بازارا؟

گون چیخیبدیر گئجه یاری ؟زولفونو چکدین کانارا؟

گلیبلر شورا بولبوللر . باخچایا سن می گلمیسن؟

قار ارییب گوللر آچیب . قیشی قویوبسان آوارا

سنین آدینی ائشیدن . بیر آندا سئللری کئچیر 

یوخسا آتالار سوزودور :  پیادا چاتماز ساوارا

هانکی شاه یا هانکی قئیصر؟ گوروردو اوزونده خالی 

بیر سمرقند بوخارا یوخ. وئرردی مین بیر بوخارا

دونیانین هر طرفنیدن . توپلایین خال بازلاریزی 

مئیدان اوخویور بو گوزل . تک خاللا چیخیب قومارا

بوتون اووچولار اوخونو . سنی گورجک سالدی الدن 

قدمه باخ .حئکمته باخ . گویرچین چیخیب شیکارا

هر آندا باخیرسان مین جان . ایاغینا قوربان گئدیر 

دئ بو گولون مناسینا . دای نه گرگ وار داوارا ؟

... گلین باخین

محببت اولان یئرده . باهاردیر گلین باخین 

داشدا تورپاغدا نازلی . نیگاردیر گلین باخین 

باغ باغچالار بولبوللو . ماراللی .جئیرانلی دیر 

اووچودا گوزللیگه. شیکاردیر گلین باخین 

دوداغلاردان مئی سوزور . هر بیر یئر میخانادیر 

ساقیله مئی پیالا . خوماردیر گلین باخین 

عشقیله چیخیر چیخان . یولا بودور سببی 

یولونون اوسته داغلار . غوباردیر گلین باخین 

بو دیاردا اودوزان . اوداننان چوخ سئوینیر 

دوزدن چوخ اوینامالی . قوماردیر گلین باخین 

اوزلردن نور پارلاییر . زامان ایشیق گئیینیب 

اولدوزلا آی گونشده . بئکاردیر گلین باخین 

دامجی جا محببتله . بیر ماهال ایش آلینیر 

آل وئری چوخ صرفه لی . بازاردیر گلین باخین 

بیر خئییرین گلیرین . عومورلوگ یئمگ اولور 

صمد ، دور دئ نه گوزل ؟ زوماردیر گلین باخین 

✍