نازینلا سرمه چکیب . گوزلرینه غزاله لر
سنین دردینله یاندیریب . اوز سینه سینی لاله لر
قوی دورسون قیراغدا خومو. دورایغا بوش جام لاری دوز
آغ الینین ایستی سینه . مست اولاجاق پیاله لر
چیخیرسان گولشنه باری . ساچلارینی توک اوزونه
گونش قالسین تئل آلتیندا . بیز آز یاشاسین ژاله لر
اوزونده کی قارا خالا . دیوان دیوان غزل ، قالسین
بوتون دیللرده یازیلیب . گور نئچه مین رساله لر
وارلیلار واریندان کئچیر . باغبانلار اوز باغلاریندان
آدین گلنده جیریلیر . قورقوشوملو قباله لر
درگاهیندان کرم آخیر . کویوندن مرحمت شاخیر
بیر پارچا گولوشه دونور . سنه چاتاندا ناله لر
***
بیلاغین گوزو بره لیب . اول سروی قدی گوررکن
حئیرتدن آستانیب دوروب . داش اوزوندن شلاله لر
گور نئجه بزم دیر حریف . گورجگ ساقینی کئفله نیر
خوم لارین آغزی باغلیدیر . یئرده قالیب حواله لر
گوزلرینه باخماقین . بیلیرسن عذابی وار
قاشلارینین طاقینین . مین خانه خرابی وار
بیر سالامین مست ائدیر . کوچه نی خیابانی
سانکی دوداغلارینین . باده سی شرابی وار
گلگینن انتظاردان . جانیم یاندی کول اولدو
هیجرانین دا گوزلیم . حددی وار- حسابی وار
عشقین سالیب چوللره . سوروشما کی هاردایام
بیر کویردیر اود یاغیر . یولونون سرابی وار
ساچین سالیر ظولمته . گوزلرین پاریلداییر
ساچین کافر ،گوزونون .دینی وار،کتابی وار
چوخو سنه چیچک له . خونچالار بزه ییبدیر
صمدین سینه سینده . یانیق بیر کبابی وار
ائشیدسن کی گئتمیشم . باری تورپاغیم اوسته
" بیرحمد و سوره اوخو". یوللا کی ثوابی وار
اوره گدن عاشیق اولان . کفرو ، ایمانی نئینیر ؟
سئوگی دن آلوو لانان . وصلی ،هیجرانی نئینیر ؟
معشوقون اوره گینین . دفترینین باشیندا
کلمه کلمه جانلانان . شعری دیوانی نئینیر ؟
چاتما کامان قاشلی نین . محرابینین ایغیندا
گئجه گوندوز سجده لی . قصری ائیوانی نئینیر ؟
عاشیقه لیلی سیندن . باشقا اوز عالمینده
جننتین مین حوری سی . اولا قوربانی نئینیر ؟
غمینه ، دردلرینه . معشوقوندان ساوایی
روم دان لقمانلار گله . وئره درمانی نئینیر ؟
یار کویونون توزونون . تورپاغینین یئرینه
آرازین اوستونده ده . قویسان مغانی نئینیر ؟
باغ اولسون بستان اولسون . گوللوگولوستان اولسون
صمد یاریلادیرسا ؟ باغی رضوانی نئینیر ؟