1]
یئنه چرشنبه
یئنه یاز
یئنه سنسیزلیگ
منیم قیشیم نئچه ایلدیر ؟
2]
بیر صحرا
بیر جئیران
بیر اووچو
ایکی دوعا ....
ایکی کاش کی ....
3 ]
دوسلار
آردیمجا سو آتین
اوزاق . چتین بیر سفره گئتمه لییم
باشیمدان.....
اوره گیمه .
4 ]
آذانچی بولبولدو سه ؟
گوله ، سجده ده
روکعتلرین سایی قالمیر
الدن چیخیر
5]
هاردا بیر گول گورورم
مات قالیرام
هاچان گلیب قوندون بورا ؟
***
خومارا کی اوز قویوب . میخانه یه دولاشما
زنجیره کی فخر ائدیر . دیوانه یه دولاشما
هر کسین بیر جانی وار . بیریولدا قویمالیدیر
نور اوغروندا جان قویان . پروانه یه دولاشما
عاریفلر کی قالیبلار . باشلارینین کویونه*
زاهیدلره آللانیب . پیمانه یه دولاشما
هربیر یانان اورگه . یقین بیر درد اود ووروب
کول آلتدا گنجی یاتمیش . ویرانه یه دولاشما
آغ اوزده قارا خالین . مین بیر حکمتی واردیر
قیزل قوشو بند ائدن . اول دانه یه دولاشما
کوراوغلو ،هجردوغان . سئللرده سارای بوغان
اصلی کرم یارادان . افسانه یه دولاشما
هر شعیرین اوزونون . جانی وار جانانی وار
صمدی مجنون ائدن . جانانه یه دولاشما
............. ........... ............
* کویونه : هایینا