ساچین کافر ....

گوزلرینه باخماقین . بیلیرسن عذابی وار 

قاشلارینین طاقینین . مین خانه خرابی وار 

بیر سالامین مست ائدیر . کوچه نی خیابانی 

سانکی دوداغلارینین . باده سی شرابی وار 

گلگینن انتظاردان . جانیم یاندی کول اولدو 

هیجرانین دا  گوزلیم . حددی وار- حسابی وار 

عشقین سالیب چوللره . سوروشما کی هاردایام

بیر کویردیر اود یاغیر . یولونون سرابی وار

ساچین سالیر ظولمته . گوزلرین پاریلداییر

ساچین کافر ،گوزونون .دینی وار،کتابی وار

چوخو سنه چیچک له . خونچالار بزه ییبدیر 

صمدین سینه سینده . یانیق بیر کبابی وار 

ائشیدسن کی گئتمیشم . باری تورپاغیم اوسته 

" بیرحمد و سوره اوخو". یوللا کی ثوابی وار

گولوش شانه سی

کوینه گینین گولونه . ائل اوبا پروانه دیر 

ساچینین زنجیرینه  .  شهرلر دیوانه دیر 

لب لرینین لعلینین . قیرمیزی شرابینا 

کوچه نین خیابانین . قولاغی پیمانه دیر 

بیردنه سن بیردنه . بو ائلده بو اوبادا 

سنه بنزر واردیسا ؟ ناغیلدی افسانه دیر 

هر بیر گولو گورورم . سنین عطرینی وئریر 

یقین باهار گوللری . سنیله همخانه دیر 

هردن بیردن لوطفیله . بیرگولوش احسان ائیله 

روحومون تئللرینه . گولوشلرین شانه دیر 

کویووه ایاغ قویان . کئفلی دوشور سجده یه 

سویله گولوم درگاهین . مسجیددی؟میخانه دیر؟

اورگه گدن عاشق اولان

اوره گدن عاشیق اولان . کفرو ، ایمانی نئینیر ؟

سئوگی دن آلوو لانان . وصلی ،هیجرانی نئینیر ؟

معشوقون اوره گینین . دفترینین باشیندا

کلمه کلمه جانلانان . شعری دیوانی نئینیر ؟

چاتما کامان قاشلی نین . محرابینین ایغیندا

گئجه گوندوز سجده لی . قصری ائیوانی نئینیر ؟

عاشیقه لیلی سیندن . باشقا اوز عالمینده

جننتین مین حوری سی . اولا قوربانی نئینیر ؟

غمینه ، دردلرینه . معشوقوندان ساوایی

روم دان لقمانلار گله . وئره درمانی نئینیر ؟

یار کویونون توزونون . تورپاغینین یئرینه

آرازین اوستونده ده . قویسان مغانی نئینیر ؟

باغ اولسون بستان اولسون . گوللوگولوستان اولسون

صمد یاریلادیرسا ؟ باغی رضوانی نئینیر ؟

.... ائدیردیم

سارماشیق اولوب باجانا . یئنه سرایت ائدیردیم

 

قاشلارینین محرابیندا . دوشوب عبادت ائدیردیم

الیم چاتمیر اللرینه . ایستی سی شفامی وئره

 

گرگ کویونون توزونا . هله قناعت ائدیردیم 

ساچلارینی هورمه سم ده.گول اوزونوگورمه سم ده 

کویونده کی زنجیرینه . گرگ کفایت ائدیردیم 

سندن اولان گیلئی لری . گئدیب فلکه دئیینجه

 

بیرگون اوزوندن اوزونه . گلیب شکایت ائدیردیم 

سنین حوسنونو آینادان هر سحر دوروب باخاندا

آیه آیه، سوره سوره . آلیب قرائت ائدیردیم

********

محترم و قدیمکی قلمداشدان بو گوزل نظیره اوچون مننتدارلیقمی بیلدیریب گوزل غزلین اوخوجولارا تقدیم ائدیرم 

بیلیدیم 

سارماشیق اولوب باجانا یئنه سارماشا بیلیدیم 

قاشلارینین محرابیندا سنله یاناشا بیلیدیم 

الیم چاتا اللرینه گوزوم باخا گوزله رینه 

بو دره نى بو تپه نى منده کاش آشابیلیدیم 

تئللرینى آجام هوره م بو آرزییا چاتماسامدا 

بیر داراغ تک ساجلارینا گولوم یاراشا بیلیدیم 

اوره گیمده آلو آلو عشقین حکایه سین کاشکى 

بو سؤگیمى گوزللرله گلیب پایلاشا بیلیدیم 

نه اولیدى آردونجا سورو نوردوم کولگه کولگه 

ایزوندن ، گونشه قدر توتوب دیرماشا بیلیدیم 

یاشایشین قورقوسونو صفحه صفحه گورم بئله

تمناسیز یاردیم ائدیر یولداش یولداشا بیلیدیم 

گوزللیگین عالمینده اؤ دیلبره گیزلین باخام 

روزگارین دوهاریندان بیرآن بویلاشا بیلیدیم 

قسمت اولا یولوم دوشه یئنه سیزون باغچادان 

لاله لاله جیجک جیجک درم داراشا بیلیدیم 

شعیر شعیر ماهنى ماهنى دوغولیدیم بوحیاتدا 

شاعیر اولوب من بیر غزل اؤ یارا قوشا بیلیدیم 

آیریلیقین حاصاریندا بیرگوزله قاش یاخیندیسا

اما هئج واخ چاتا بیلمیرهمین گوزقاشا بیلیدیم 

قیزیل میغان تورپاغیندا چاى اولایدیم آرازآراز 

بالهارینان بیر آخماغا آشیب هم جوشا بیلیدیم 

کول آلتیندا مین امیدلن هله ده کوز کوز آلیشان 

انجمنین اوجاغیندا بیرگون قیزیشا بیلیدیم 

تقدیم اولسون بوتون شعر ادب خصوصیلا غزل هوسکارلارینا یاشاسین شعرى میز یاشاسین عشق یاشاسین قوجا بیله سوار

آغری ییر

بو گئجه قلم سوسوبدور . شعریمین باشی آغری ییر 

کیپریگلریم ایسلانیبدی . گوزومون یاشی آغری ییر 

عوموردو گوز تیکیب یولا . دوداغیندان کاش کاش آخیر

اول قدر آه چکیبدیر کی . آرزیمین کاشی آغری ییر

اوره گیم یاوا دویونور . گاه بولوتدو ،گاه چشمه دی 

ائله سانجیلاییبدیر کی . دئییرسن ناشی آغری ییر 

قافیه لر ایتیبدیلر . ردیفلر پریشان دوشوب 

شعریمین گوزو مات قالیب . اوتوروب قاشی آغری ییر 

صمد سانکی درد چکمه ییر . نه داوا - نه درمان بیلیر 

سیجیللی سینه باخیردیم . گوردوم کی یاشی آغری ییر